מהנעשה והנשמע בחצה"ק קאשוי
-
-
קול רנה וישועה באהלי צדיקים!
שמחה דקדושה ביי תלמידי וחסידי קאשוי אין בעפארברייטונג צום גרויסן שמחה בבית צדיקים די חתונה הגדולה קומענדיגן דאנערשטאג תולדות הבעל"ט
החתן חיים שליט"א בן הרה"ג ר’ שלום יהושע העשיל בלום שליט"א בן כ"ק אדמו"ר שליט"א וחתן כ"ק גאב"ד יעמרינג שליט"א,חדב"נ - עב"ג הכלה בת הרה"ג ר’ שרגא צבי טענענבוים שליט"א בן הגה"צ אב"ד מילדוי שליט"א וחתן הגה"צ אב"ד קאמינקא שליט"א
שבת עלי’ לתורה בצל הק’ דעם שב"ק פר’ חיי שרה-מברכים - עריכת השלחן ליל שב"ק אין ביהמ"ד הג’ אויף ספענסער סטריט
שמחת החתונה וועט פארקומען ברוב פאר והדר באולם פרדס צבי
מיט רגשי שמחה וחדוה גרייטן זיך תלמידי וחסידי קאשוי, צום גרויסן שמחת החתונה במעונו פונעם רועה נאמן כ"ק אדמו"ר שליט"א, ווען עס וועט גיין אונטער די חופה בשעה טובה ומוצלחת נכדו החתן הרב חיים בלום שליט"א, בן לבנו הרה"ג ר’ שלום יהושע העשיל שליט"א, איידעם ביי כ"ק הגה"צ גאב"ד יעמרינג שליט"א -חדב"נ פון כ"ק מרן רביה"ק זצוק"ל-. עב"ג הכלה תחי’ בת הרה"ג ר’ שרגא צבי טענענבוים שליט"א בן הגה"צ אב"ד מילדוי שליט"א וחתן הגה"צ אב"ד קאמינקא שליט"א. וואס וועט געפראוועט ווערן ברוב פאר והדר קומענדיגן דאנערשטאג תולדות הבעל"ט אין די זאלן פון פרדס צבי אין וויליאמסבורג.
שבת עלי’ לתורה
די געהויבענע שמחה בבית הצדיקים הייבט זיך אן ביים שבת עליה לתורה, וואס וועט אפגעראכטן ווערן מיט די באטייליגונג פון פילצאליגע חסידים ומעריצים מתושבי העיר, הונדערטער אנ"ש תלמידים ואברכי הישיבות, די חשוב’ע מחותנים שליט"א, און בני המשפחה הע"י. וואס וועלן מיטהאלטן די געהויבענע שמחה’דיגע מאמענטן בבית המדרש הגדול אויף ספענסער סטריט, בראשות פונעם ראש בית אב כ"ק אדמו"ר שליט"א.
תערוך לפני שלחן: ליל שבת קודש וועט פארקומען דעם עריכת שולחן הטהור פון רבינו שליט"א בשעה 9:15, ווען דער היכל בית המדרש הגדול וועט ווערן אויסגעשטעלט אויף א מייסטערהאפטן פארנעם, צו קענען אקאמאדירן דעם ציבור הגדול, לשמח ולשמוח בשמחת צדיקים.
שבת קודש אינדערפרי וועט פארקומען די שמחת עליה לתורה און די קידושא רבה לרגל המאורע, בקול רנה ותודה. און שפעטער די ווארימע שלש סעודות מיט רגשי קודש צום געהויבענעם זמן, זיך גרייטנדיג צו די חתונה הגדולה ווען די אבות הק’ קומען אראפ פון גן עדן אנטייל נעמען, און איבערלאזן ברכות לרוב פאר אלע משתתפים תלמידים ומעריצים.
שמחת החתונה
די שמחת החתונה וועט פארקומען קומענדיגן דאנערשטאג תולדות בשעה טובה ומוצלחת, אין די זאלן פון פרדס צבי, בהשתתפות פילע תלמידי וחסידים יוצאי ובני הישיבות, אין שפיץ פון רבני ואדמור"י העיר שליט"א, וואס וועלן זיך מיטפרייען מיט די געהויבענע מחותנים ובעלי השמחה הגאוה"צ שליט"א.
דאס וועט קומען צום קלימאקס ביי די גאר געהויבענע מצוה טאנץ פון מרן רבינו שליט"א, וואס וועט מקיים זיין דעם “כיצד מרקדין לפני הכלה” מיט התרוממות הנפש, מיטשלעפנדיג דעם גאנצן ציבור אין דעם עת משוש, מיט א שמחה דקדושה.
דורכאויס די שבעת ימי המשתה וועט אפגעראכטן ווערן בע"ה די צענטעראלע שמחת שבע ברכות רבתי דעם קומענדיגן מוצש"ק תולדות בהיכל ביהמ"ד אויף ספענסער סטריט, צוגעשטעלט דורך די הנהלת הקהלה בתופים ובמחולות, א רייכע סעודה וועט סערווירט ווערן, און א הערליכע פראגראם ווערט צוגעגערייט, נאכפאלגענדיג מיט געהויבענע ריקודין של שמחה. פרטים וועט נאכפאלגן.
עס איז דער וואונטש, אז די שמחה הגדולה זאל ברענגען השפעות טובות לנו ולכל ישראל, און דער רבי שליט"א און געהויבענע זיידעס זאלן ווייטער זען בלויז תענוג ונחת דקדושה, עוד ינובון בשיבה דשנים ורעננים, זיך צו פרייען אינאיינעם מיט די באליבטע תלמידים הקרויים בנים, ביז מען וועט זוכה זיין בקרוב צו די אייביגע שמחה ווען עס וועט מקוים ווערן די נביאות “עוד ישמע בערי יהודה ובחוצות ירושלים קול ששון וקול שמחה”, בב"א.
וזוכר חסדי אבות ומביא גואל לבני בניהם! -
-
אין לו הקב"ה בעולמו אלא ד"א של הלכה בלבד
צום נייעם זמן: קול תורה הילעכט אפ אינערהאלב תורה אימפעריע פון קהל ומוסדות קאשוי
ישיבה קטנה - ישיבה גדולה - כולל ברכות שמים - כולל ערב זכרון אהרן משה
מיט געוואלדיגע הצלחה און גאר שטארקע סוקסעס האט זיך אנגעהויבן דער זמן החורף אינערהאלב די אפטיילונגען פון קהל ומוסדות קאשוי, ווען די היכלי התורה דונערן מיט א געוואלדיגע קול תורה, פון די לומדים החשובים וואס שטייגן על התורה ועל העבודה, על דרך התורה והמסורה.
די התחדשות דערקענט זיך אין יעדן הינזיכט, אנגעהויבן אין ישיבה גדולה, וואו עס זענען צוגעלייגט געווארן פרישע כוחות פון חשוב’ע מרביצי תורה, אויפצוהייבן דעם כח התורה, און די חשוב’ע תלמידים וואס זענען ממית באהלה של תורה. צווישן אנדערע איז אויפגענומען געווארן מיט פרייד די התמנות פונעם חשוב’ן מגיד שיעור הרה"ג ר’ ישראל מאסקאוויטש שליט"א, אלס ר"מ ומגיד שיעור אויף שיעור עיון.
באזונדער דערקענט זיך א שטארקע ריבוי פון נייע תלמידים, אין א בחינה פון “ניתוספו ספסלי דבית המדרש”, די ישיבה גדולה און דארמיטארי זענען איבערגעפילט מיט די בחורי חמד היקרים, וואס וועלן בעז"ה שטייגן און נתעלה ווערן אין דעם מקום קדוש.
די ישיבה איז אויך זוכה צו א קירבה יתירה ביי כ"ק רבינו שליט"א, וואס באזוכט אין ישיבה בקביעות, און דאוונט בין כותלי בית המדרש. דערנאך קומען פאר די וועכענטליכע שיעורי הלכה אין שולחן ערוך או"ח, וואו מען לערנט יעצט אדורך די וויכטיגע הלכות פון הלכות תפילה מיט א געוואלדיגע קלארקייט.
דאס זעלבע איז אין ישיבה קטנה, ווי די חשוב’ע מגידי שיעור געבן זיך אפ מיט אויסטערלישע געטריישאפט און איבערגעגעבנקייט פאר יעדן איינציגן תלמיד, צו פארזיכערן זיין הצלחה און גאלדענעם צוקונפט.
די חשוב’ע בחורים האבן די זכיה מיטצוהאלטן די וועכנטליכע שיעור בספה"ק אור החיים הק’, וואס ווערט פארגעלערנט דורך כ"ק מרן רבינו שליט"א, יעדן דאנערשטאג פארמיטאג, באגלייט מיט דברי מוסר און התחזקות בעניני עבודת ה’.
באזונדער שפירט זיך א שטארקע התחדשות אינערהאלב דעם היכל הכולל “ברכות שמים”, וואס איז קווארטירט אין א מקום רחבת ידים, בבית המדרש נייטרא אויף ראטלידזש סטריט. ווי מען אקערט אדורך מקצוע נאך מקצוע, מיט די באגלייטונג פונעם חשוב’ן ראש הכולל הרה"ג ר’ יואל פאשקעס שליט"א מו"ץ בק"ק סאטמאר.
דער כולל האט אין קורצע יארן זינט דאס התייסדות באוויזן זיך קונה שם צו זיין אלס זעלטענע מקום תורה, וואו די לומדים מופלגים זענען קונה די וויכטיגע הלכות מיט א קלארקייט, לדעת את המעשה אשר יעשון. צום נייעם זמן האט מען אנגעהויבן די וויכטיגע מקצועות פון הלכות שבת דיני בונה וסתירה, און יו"ד הלכות טהרה.
גאר שטארק האט ארויסגעשטארצט דעם באגריסנדן פאקט, ווי במשך די פארגאנענע זומער וואכן איז דער כולל אנגעגאנגען תמידין כסדרן, טראץ די רעלאטיוו ליידיגע שטאט, און גרעסערע ציבור אין קאנטרי.
אויך אין די נאכט שעות שטעלט זיך נישט אפ דער היליכיגער קול תורה, ווען די צענדליגע לומדים אינעם כולל ערב “זכרון אהרן משה” פולן אן דעם בית המדרש מיט קביעות עתים לתורה, בני תורה אינאיינעם מיט בעלי בתים חשובים זענען זיך קובע על התורה ועל העבודה, אויסנוצן די נאכט שעות מיט שיעורי תורה כראוי וכיאות.
דער כולל ווערט פינאנצירט דורך ידידינו הרבני הנגיד הר"ר אפרים צבי ווייס שליט"א ובניו החשובים, לע"נ אביו וזקינם הרה"ח ר’ אהרן משה ווייס ז"ל, זכות לימוד תורה דרבים יעמוד להם.
עס איז די תפילה און וואונטש, די כח התורה זאל ווייטער שטייגן און בליען ביתר שאת, וחפץ ה’ בידינו יצליח להגדיל תורה ולהאדירה.דרשת פתיחת הזמן דורך כ"ק אדמו"ר שליט"א פאר אריבער דריי הונדערט לומדים כ"י בתוככי ישיבה קטנה - ישיבה גדולה - כולל לאברכים ד’קאשוי
אין לויף פון די ערשטע וואך אינעם נייעם זמן האבן די הונדערטער תלמידים פון די מוסדות הק’, ישיבה קטנה, ישיבה גדולה, און רבני ולומדי כוללינו, געהאט די זכיה צו הערן דרשות פתיחת הזמן וואס איז געזאגט געווארן אין יעדע אפטיילונג באזונדער, דורך דעם פום ממלל רברבן כ"ק מרן אדמו"ר שליט"א.
דער רבי שליט"א האט אין די דברות קודש מאריך געווען א לענגערע צייט מיט דברי הדרכה וחיזוק, פאר די חשוב’ע יושבי באהלה של תורה. יסודות פאר די בחורי חמד אין זייערע לימודים און הנהגה. און באזונדער גאר שטארקע דברי חיזוק פאר די רבני ולומדי הכולל וואס זיצן און לערנען תורה בהתמדה יומם ולילה.
פתחו שערים ויבא גוי צדיק -
לשמוע דבר השם: כ"ק אדמו"ר שליט"א ביים דרשת פתיחה פאר די בני הכולל שליט"א
-
בילדער: כ"ק אדמו"ר שליט"א ביים דרשת פתיחת הזמן בהיכל ישיבה גדולה
-
בילדער: כ"ק אדמו"ר שליט"א זיך באטייליגט ביים צענטעראלע שמחת שבע ברכות בחצר הק’ סאטמאר
-
בילדער: כ"ק אדמו"ר שליט"א זיך באטייליגט ביים חגיגת הכנסת ספר תורה לע"נ הרבנית הצדיקת ע"ה מחברתו הטהורה פון כ"ק גאב"ד יאוואזשנא שליט"א
-
כ"ק אדמו"ר מקאשוי שליט"א אצל שמחת החתונה בבית סקולען - טשערנאביל
